《高山低谷》Guitar Fingerstyle

自 funguitar.pro 呢個平台出世後，反應唔錯，一啲以前彈落，呼聲比較高嘅樂譜，執一執就係時候上架啦。今次搵咗一位高材生 Po Po 代勞，其一係佢真係好高，其二係佢係一個用心練習嘅同學，兩分鐘錄音一 take 過，接近非常完整，（credit to @laifungshan.guitar )。以下係佢打出黎感想嘅原文（保證冇執過，或者佢背後冇槍指住），最後都係一樣，樂譜於 funguitar.pro 不日上架。

當初知道有機會錄「高山低谷」呢首歌時，就知道左手同右手嘅準繩度要求要相當高，想彈奏得乾淨啲，所以唯有不停地練習，希望作品出嚟效果理想。

上堂時峰校長曾經講過一段說話好刻骨銘心，佢提出過彈結他就好似唱歌咁，只不過係將結他嚟代替嘴巴，唱歌時你會自然想表達情感，彈結他亦然。所以係練習嘅期間，亦不知不覺間投放咗好多情感，情感隨著結他聲音抒發出嚟，彈奏完就舒服了，多謝峰校長用心教導。

疫情下，各人都有著各樣嘅負面情緒，儘管低谷可能非常漫長，不過要相信低谷過後嘅高山總會來臨，一齊加油，YOU ARE NOT ALONE 🤜🏻🤛🏼