暫時係輸港果廿幾三十支 Bourgeois 入面，最多人好奇嘅，一定係 Tunnel 13 Redwood 到底係咩聲。過去都只係見外國人彈多，今日就等我呢個第一身用家講下。
屬於傳說級物料，從隧道大火後灰燼裡重生，超過二千年嘅神級紅木，極度罕有，全球估計不超過二百支。坊間由北美手工廠造的 Tunnel 13 Redwood，至少六位數字的身價，以致談論的人多，親身彈過聽過的人很少。
上年三月，陰差陽錯有熟人介紹，再憑住一分唔放棄嘅毅力，居然俾我搵到四套真跡，對我黎講，好似中咗次六合彩一樣。Dana 為我這支 T13 Redwood 配上 Cocobolo，為我度身訂造了這一支 Fingerstyle Custom ，亦是 Bourgeois 第一支做的 Tunnel 13 Redwood 結他，足見罕見程度。
到手都有大半年，一直都諗唔到有咩歌可以襯得起佢，直到上星期六同兩個小徒一路食 tea，一路聽 Eason 個 Live。 “防不勝防” 聽到我哋三個都起晒雞皮。當時我已經暗暗哋決定 “黃金時代” 後要編埋呢首，同埋寫份譜滿足下呢兩位小徒。本來打算簡單啲，編個 Standard Tuning + G Key 就好了，但仔細再聽幾次，呢個前奏唔編唔得。鋼琴嘅深清，加上 Bass 襯底營造嘅陰暗面，一正一邪，正正係呢首歌嘅精華所在。
就係咁，強迫症發作，用咗兩日為呢首歌設計咗個 Tuning，AGDGAD，你冇睇錯，第六弦真係由 E drop 到去 A。先不說編曲難度，呢個 Tuning 已經考起好多結他，呢個 drop A 可能一彈已經化開散晒。
如我上述所言，精華盡在起首十秒，在我手上的 Tunnel 13 Redwood，面對這個 drop A 仿如無物，比我想像潛得更深，hold 得更長更穩。據 Dana 稱，Tunnel 13 Redwood 剛性罕見地高，不愧為支撐起隧道的主要木材，足以媲美 Adirondack，讓他擁有一般 Redwood 結他難以擁有的清晰度，加上 Cocobolo 的如鈴噹嘅高頻，將 Harmonics 以分離度極高嘅方向演繹。
這份極闊的動態，彷如精神分裂一樣，兩個角色互相角力，用黎演繹呢一首又深情又恐佈嘅作品，三個字：襯到絕（不得不讚作曲的張繼聰）。
你又會諗到啲咩歌啱佢發揮呢？
